ފަހުވަގުތު ހާމިދު ޖަހައިދިން ގޯލުން ފިއްލަދޫ އަތުން މޮޅު އިހަވަންދޫ އުންމީދު އާކޮށްފި

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން  ބާއްވާ "އެފްއޭއެމް ފުޓްސަލް ޗެމްޕިއަންޝިޕް" ގެ ޒޯން ބުރުގައި ފަހަތުންއަރާ ފިއްލަދޫ ބަލިކޮށް އިހަވަންދޫ ފައިނަލްގެ އުންމީދު އައު ކޮށްފިއެވެ. 

މިއަދު ހަވީރު ކުޅުނު މެޗްގައި ފަހު ހާފުގެ 7 ވަނަ މިނެޓްގައި ފިއްލަދޫގެ އުފާލް ގޯލް ޖަހައި ލީޑް ހޯދިއިރު، އިހަވަންދޫއަށް ނަތީޖާ ހަމަކޮށްދިނީ ފަހު ހާފުގެ 12 ވަނަ މިނެޓްގައި، އިހަވަންދޫ ޓީމްގެ ޝިފާޒް އެވެ. މެޗް އެއްވަރުވެގެން ނިމެން ދަނިކޮށް، އިހަވަންދޫ މެޗުން މޮޅުވި ގޯލް ޖެހީ މެޗްގެ ފުރިހަމަ ވަގުތު ހަމަވި ފަހުން ފަހު ހާފުގެ 22 ވަނަ މިނެޓްގައި، އިހަވަންދޫ ޓީމްގެ ހާމިދުއެވެ. 

ދެން މިމުބާރާތުގައި އިހަވަންދޫ ނުކުންނާނީ ށ. ކަނޑިތީމާއި ދެކޮޅަށެވެ. އެމެޗުން މޮޅުވެގެން އިހަވަންދޫ ޓީމަށް ޒޯން ބުރުގެ ފައިނަލުން ޖާގައެއް ހޯދުމުގެ ފުރުސަތު އެބައޮތެވެ. މިއަދުގެ މެޗްގެ ރެފްރީންގެ ބައެއް ނިންމުން ތަކާއިމެދު އިހަވަންދޫ ޓީމުން ވަރަށް ބޮޑަށް އިހްތިޖާޖްކުރަމުން ދިޔަކަން ފާހަގަކުރެވެއެވެ. 

 ނޯތް ޒޯން 1 ގައި 5 ޓީމެއް ވާދަކުރެއެވެ. އެއީ ހއ އަތޮޅުން، އިހަވަންދޫ އަދި ފިއްލަދޫ، ހދ އަތޮޅުން ނައިވާދޫ އަދި ހަނިމާދޫގެ އިތުރުން ށ އަތޮޅުން ކަނޑިތީމެވެ. ޒޯން ބުރުގެ ފައިނަލަށް ދަތުރުކުރާނީ މި 5 ޓީމްގެ މެދުގައި ކުޅޭ ލީގުބުރުން އެންމެ ގިނަ ޕޮއިންޓް ހޯދާ ދެ ޓީމެވެ.