ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މުޅިން އަލަށް ތައާރަފްކޮށްގެން ބާއްވާ "އެފްއޭއެމް ފުޓްސަލް ޗެމްޕިއަންޝިޕް" ގެ ޒޯން ބުރުގައި އިހަވަންދޫ ކުޅޭ 3 ވަނަ މެޗްގައި މިއަދު ފިއްލަދޫއާ ދެކޮޅަށް ނުކުންނާނެއެވެ.
ހދ. ނައިވާދޫގައި ކުޅޭ މިމެޗް ފަށާނީ މިއަދު ހަވީރު 16:45 ގައެވެ. އަމިއްލަ ބާރުގައި ފައިނަލަށް ދަތުރުކުރުމަށް މިމެޗުން މޮޅުވުން އިހަވަންދޫ އަށް މަޖުބޫރު ވާނެއެވެ. މި ދެ ޓީމް އަތޮޅު ރައުންޑްގައި ކުޅުނު މެޗުން ފަސޭހަ ކަމާއިއެކު އިހަވަންދޫ ވަނީ މޮޅުވެފައެވެ.
ޒޯން ބުރުގައި އިހަވަންދޫ ޓީމް ކުޅުނު ފުރަތަމެޗުން ހަނިމާދޫގެ މައްޗަށް ކުރި ހޯދުނަސް ދެވަނަ މެޗްގައި ވަނީ ނައިވާދޫ އަތްދަށުވެފައެވެ. ދެމެޗް ކުޅުނު ނައިވާދޫ 6 ޕޮއިންޓާއިއެކު ޕޮއިންޓް ތާވަލްގެ އެއްވަނާގައި އޮތްއިރު، 4 ޕޮއިންޓާއި އެކު ދެވަނާގައި އޮތީ ކަނޑިތީމެވެ. 3 މެޗް ކުޅެފައިވާ ފިއްލަދޫ އަށްވެސް 4 ޕޮއިންޓް ލިބިފައިވާ ނަމަވެސް ގޯލް ތަފާތުން އޮތީ 3 ވަނާގައެވެ.
ދެމެޗް ކުޅެފައިވާ އިހަވަންދޫ 3 ޕޮއިންޓާއިއެކު މިވަގުތު އޮތީ 4 ވަނާގައެވެ. އަމިއްލަ ބާރުގައި ފައިނަލަށް ދަތުރުކުރުމަށް މިއަދުގެ މެޗުން މޮޅުވުން އިހަވަންދޫ ޓީމަށް ވަރަށް މުހިއްމެވެ. ގްރޫޕް ސްޓޭޖްގެ ފުލުގައި އޮތީ ތިން މެޗުންވެސް ޕޮއިންޓެއް ލިބިފައިނުވާ ހަނިމާދޫއެވެ.
ނޯތް ޒޯން 1 ގައި 5 ޓީމެއް ވާދަކުރެއެވެ. އެއީ ހއ އަތޮޅުން، އިހަވަންދޫ އަދި ފިއްލަދޫ، ހދ އަތޮޅުން ނައިވާދޫ އަދި ހަނިމާދޫގެ އިތުރުން ށ އަތޮޅުން ކަނޑިތީމެވެ. ޒޯން ބުރުގެ ފައިނަލަށް ދަތުރުކުރާނީ މި 5 ޓީމްގެ މެދުގައި ކުޅޭ ލީގުބުރުން އެންމެ ގިނަ ޕޮއިންޓް ހޯދާ ދެ ޓީމެވެ.
ކޮމެންޓް
އަދި ކޮމެންޓެއް ނެތް