އިހަވަންދޫ އޯޕަން ސްޓޭޖް ގޯތި ތެރޭގައި މައިޒާނެއް ހަދައިދޭނެ ފަރާތެއް ހޯދަން އިހަވަންދޫ ކައުންސިލުން އިއުލާންކޮށްފިއެވެ. ކައުންސިލުން މިމައިޒާން ތަރައްޤީކުރަނީ، އޯޕަން ސްޓޭޖްގެ ހުޅަނގު ދެކުނު ކަންމަތީގައެވެ. ކައުންސިލުން އެމައިޒާން ތަރައްޤީކުރަނީ، އާމުން ހިންހަމަ ޖައްސައިލުމަށާއި، އިޖުތިމާޢީ ބައްދަލުވުންތަކަށާއި، އަދި އާއިލާ ތަކާއިއެކު އުފާވެރި ވަގުތުކޮޅެއް ހޭދަކޮށްލުމުގެ ފުރުސަތު ރައްޔިތުންނަށް ހޯދައިދިނުމުގެ މަޤްސަދުގައެވެ.
ކައުންސިލުން ހާމަކޮށްފައިވާ ގޮތުގައި، އެ މައިޒާން ތަރައްޤީކުރުމުގެ މައިގަނޑު މަގުސަދަކީ އެ ސަރަހައްދަކީ ހިއްޤައިމު، ތިމާވެއްޓާއި ރައްޓެހި އަދި އެކި އުމުރުފުރައިގެ މީހުންނަށް ބޭނުންކުރެވޭނެފަދަ އިންތިޒާމްތަކެއް ހަމަޖެހިފައިވާ އަމާން ތަނަކަށް ހެދުމެވެ. އެގޮތުން، ދިވެހި ސަގާފީ ސިފަތަކާއި ޒަމާނީ ފުރިހަމަކަން އެކުލެވޭގޮތަށް ތައްޔާރުކުރެވޭ ހަޓަކާއި، ފޮތްކިޔުމާއި ރާޒުވާފަދަ ފިކުރީ ކުޅިވަރުތައް ކުޅެވޭނެ ވަސީލަތްތައް އެމައިޒާނުގައި ގާއިމުކުރާނެއެވެ.
މިމައިޒާން ތަރައްޤީކުރުމަށް ޝައުގުވެރިވާ ފަރާތްތަކުން މިހިނގާ އޮކްޓޯބަރު މަހުގެ 7 ވާ ބުދަ ދުވަހުގެ ކުރިން ބީލަމުގައި ރަޖިސްޓްރީވެ އޮކްޓޯބަރު 11 ވާ އާދިއްތަ ދުވަހުގެ 11:30 އަށް އަންދާސީ ހިސާބު ހުށަހަޅަންޖެހޭނެކަމަށް، މިކަމާގޫޅިގެން އިހަވަންދޫ ކައުންސިލުން ކޮށްފައިވާ އިއުލާނުގައިވެއެވެ.
އޯޕަން ސްޓޭޖް ސަރަހައްދުގައި މައިޒާނެއް ތަރައްޤީކުރުމަށް އިހަވަންދޫ ކައުންސިލުން ނިންމައިފައިވަނީ، މިދިޔަ އޯގަސްޓް މަހުގެ 5 ވަނަ ދުވަހު ބޭއްވި، އިހަވަންދޫ ކައުންސިލްގެ 5 ވަނަ ދައުރުގެ 12 ވަނަ އާންމު ޖަލްސާގައެވެ.
އިހަވަންދޫ އޯޕަން ސްޓޭޖް ހުޅަނގު ދެކުނު ކަންމަތީގައި މައިޒާނެއް ތަރައްޤީކުރުމަށް ހުށަހެޅުއްވީ ކައުންސިލްގެ ނައިބު ރައީސް މޫސާ އަލީއެވެ. މޫސާ އަލީގެ ހުށަހެޅުއްވުމަށް ކައުންސިލަރު ނާޞިރާ ޢަބްދުލްވާޙިދު ތާއީދު ކުރެއްވިއިރު، އެހުށަހެޅުން ފާސްކުރީ އެޖަލްސާއަށް ހާޒިރުވި 4 މެމްބަރުންގެ ވޯޓާއިއެކު އިއްތިފާގުންނެވެ. ކައުންސިލުން އައު މައިޒާނެއް ތަރައްޤިކުރުމަށް މިނިންމި ސަރަހައްދަކީ މިހާރުވެސް ގިނަބަޔަކު މުނިފޫހިފިލުވުމާއި، ހިންހަމަޖައްސައިލަން ޖަމާވާ ސަރަހައްދެއްކަން ފާހަގަކުރެވެއެވެ. ހާއްސަކޮށް އެސަރަހައްދުގައި ރާޒުވާ ފަދަ ކުޅިވަރުކުޅުމަށް މީހުން ޖަމާވާކަން ފާހަގަކުރެވެއެވެ.
ކޮމެންޓް
އަދި ކޮމެންޓެއް ނެތް