އޯޕަން ސްޓޭޖް ބިމުގައި އައު ކައުންސިލް އިދާރާ އެޅުމާއިމެދު ބައެއް ކައުންސިލަރުން ހިޔާލު ތަފާތުވެއްޖެ!

ހއ. އިހަވަންދޫ ކައުންސިލް އިދާރާގެ އައު އިމާރާތް އެޅުމަށް ކަނޑައެޅިފައިވާ ބިމާއިމެދު ރައްޔިތުންގެ ހިޔާލު ހޯދުމަށް ދިން ފުރުސަތުގައި ބައިވެރިވި ފަރާތްތައް މަދުވުމުގެ އިތުރުން، އެ ބިމަކީ އޯޕަން ސްޓޭޖް ހުރި ބިންކަމަށް ކަނޑައެޅުމާ ގުޅިގެން ސޯޝަލް މީޑިއާގައި ގިނަ ޝަކުވާތަކެއް ދަނީ ކުރަމުންނެވެ. މި ޝަކުވާތަކާއި ގުޅިގެން، ކައުންސިލުން ކުރިން  ނިންމާފައިވާ ގޮތާއި މެދު ބައެއް  ކައުންސިލަރުންގެ ހިޔާލު ތަފާތުވެ، މި މައްސަލަ އަލުން ރިވިއުކުރުމަށް މަސައްކަތް ކުރަމުންދާކަމަށް މަޢުލޫމާތު ލިބިއްޖެއެވެ. އިހަވަންދޫ ކައުންސިލުން އައު ކައުންސިލް އިމާރާތް އެޅުމަށް ކަނޑައެޅިފައިވާ ބިމާއިމެދު ރައްޔިތުންގެ ހިޔާލު ހޯދުމަށް ދިން ދެ ދުވަހުގެ މުއްދަތުގައި 3767 މީހުންގެ އާބާދީއެއް އޮންނަ އިހަވަންދޫއިން ހުށަހެޅުނީ އެންމެ 28 ހިޔާލެވެ. މިއީ އާބާދީގެ އެންމެ %0.74 އެވެ. މި ޢަދަދުން ދައްކުވައިދެނީ މިކަމުގައި ރައްޔިތުންގެ ބައިވެރިވުން ވަރަށް ބޮޑަށް ދަށްކަމެވެ. ކައުންސިލުން އައު އިމާރާތް އެޅުމަށް އޯޕަން ސްޓޭޖްހުރި ބިން ކަނޑައެޅުމާއިއެކު، ސޯޝަލް މީޑިއާ ޝަކުވާތަކުން ފުރާލިއެވެ. "ވޯޓްދިނީ ކިތައްމީހުންތޯ؟ ވޯޓްލީ ކޮންބައެއްތޯ؟" މިފަދަ ސުވާލުތައް އާންމުންގެ ތެރެއިން އުފައްދަން ފެށިއެވެ. މަޢުލޫމާތު ލިބިފައިވާ ގޮތުގައި މި މައްސަލާގައި ރަށުގެ ބައެއް އިސްވާރުން ގެންދަނީ  ވަކިވަކި ކައުންސިލް މެންބަރުންނަށް، އޯޕަން ސްޓޭޖް ނަގާފައި އައު ކައުންސިލް އިދާރާ އިމާރާތް ނުކުރުމަށް  ލޮބީކުރަމުންނެވެ. އެގޮތުން ކުރީގެ ކަތީބެއް ކައުންސިލަރުންނަށް ފޮނުވާފައިވާ ވަރަށް އަސަރުގަދަ ސިޓީއެއްގެ ކޮޕީވެސް މިނޫހަށް ވަނީ ލިބިފައެވެ. މިމައްސަލާގައި އާންމުންގެ ތެރެއިން ބަޔަކު އެކުވެ ޕެޓިޝަނެއްވެސް ތައްޔާރުކުރުމުގެ މައްސައްކަތް ކުރަމުންދާކަން ވަނީ އެނގިފައެވެ. އެގޮތުން އޭގެތެރެއިން މީހަކު މިނޫހަށް މަޢުލޫމާތު ދީފައިވާ ގޮތުގައި މިކަމުގައި ރައްޔިތުންގެ ޑިމާންޑްތައް ކައުންސިލަށް ވަރަށް އަވަހަށް ފޮނުވާނެއެވެ. އޯޕަން ސްޓޭޖްގައި ގިނަ ހަރަކާތްތައް ހިންގާ ޖަމިއްޔާއެއް ކަމަށްވާ، އިހަވަންދޫ މަސްވެރިންގެ ގުޅުން (އިމަގު) ޖަމިއްޔާއިވެސްވަނީ، އޯޕަން ސްޓޭޖް ހުރި ސަރަހައްދުގައި ކައުންސިލްގެ އައު އިދާރާ އެޅުމާއި މެދު ދެވަނަ ވިސްނުމަކަށް ދިއުމަށް އެދި އިހަވަންދޫ ކައުންސިލަށް ސިޓީއެއް ފޮނުވާފައެވެ. މިނޫހާ ވާހަކަދެއްކި ކައުންސިލަރަކު ބުނީ ، އޯޕަން ސްޓޭޖް ބިމުގައި އައު ކައުންސިލް އިދާރާ އެޅުމަށް ކައުންސިލުން ނިންމާފައިވާ ނިންމުމާއި މެދު ބައެއް ކައުންސިލަރުންގެ ވިސްނުން ބަދަލުވެ، އައު ކައުންސިލް އަޅާ ބިން ރިވިއުކުރުމަށް ޖަލްސާއަކަށް އެޖެންޑާކުރުމަށް ބައެއް ކައުންސިލަރުން މަސައްކަތް ކުރަމުންދާ ކަމުގައެވެ. އެގޮތުން އެކައުންސިލަރުންގެ ވިސްނުމުގައި، އައު ކައުސިލް އިދާރާ އެޅުމަށް ކަމުދަނީ  ބަނދަރުގެ އިރުމަތިން މާތިލަގެއާ ދިމާ ކުރިމަތީ އޮންނަ ހުސް ބިންކަމަށް މައުލޫމާތު ލިބެއެވެ. މި މައްސަލަ ކައުންސިލްގެ ތެރޭގައި އަދި އާންމުންގެ މެދުގައިވެސް ހޫނުވެފައި ވާއިރު، މިކަމުގައި ކައުންސިލުން އެންމެ ފަހުން ނިންމާނެ ގޮތެއް ބެލުމަށް އެންމެވެސްތިބީ އިންތިޒާރުގައެވެ.