އިހަވަންދޫއާއި އެކު 4 ރަށެއްގައި އިސްލާމީ މަރުކަޒު އިމާރާތްކުރާން ކޮންޓްރެކްޓަރުން ހޯދަނީ!

އިހަވަންދޫއާއި އެކު 4 ރަށެއްގައި އިސްލާމީ މަރުކަޒު އިމާރާތްކުރުމަށް ކޮންޓްރެކްޓަރުން ހޯދަން އިއުލާންކޮށްފިއެވެ. މިނިސްޓްރީ އޮފް ފިނޭންސް އެންޑް ޕްލޭނިންގ އިން މިއަދު ކޮށްފައިވާ އިއުލާނުގައިވަނީ، މިއީ މިނިސްޓްރީ އޮފް އިސްލާމިކް އެފެއާޒްގެ އެދިލެއްވުމުގެ މަތިން، ކޮށްފައިވާ އިއުލާނެއްކަމުގައެވެ. މިމަސްރޫޢުގެ ދަށުން، އިސްލާމިލް މިނިސްޓްރީއިން އިސްލާމީ މަރުކަޒުއެޅުމަށް ނިންމާފައިވާ 4 ރަށަކީ ށ. ފުނަދޫ، ހއ. އިހަވަންދޫ، ޅ. ނައިފަރު އަދި ގއ. ވިލިގިއްޔެވެ. މިމަޝްރޫއުގެ ބިޑު 16 ޖުލައިގެ 14:00 ގެކުރިން ހުށަހަޅަން ޖެހޭއިރު، ބިޑު ހުޅުވުން އޮންނާނީ 17 ޖުލައިވާ ބުރާސްފަތި ދުވަހުގެ ހެނދުނު 11:00 ގައެވެ. 2024 ވަނަ އަހަރުގެ ދައުލަތުގެ ބަޖެޓުގައި، އިހަވަންދޫގައި ފެށުމަށް ކަނޑައެޅިފައިވާ އައު މަޝްރޫޢުތަކުގެ ތެރޭގައި އިހަވަންދޫގައި އައު މިސްކިތެއް އިމާރާތްކުރުމަށް ބަޖެޓް ކޮށްފައިވެއެވެ. 2024 ވަނައަހަރުގެ ފެބުރުއަރީ މަހުގެ 24 ވަނަދުވަހު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިހަވަންދުއަށް ކުރެއްވި ދަތުރުފުޅާއި ގުޅިގެން  އިހަވަންދޫ ރައްޔިތުންނަށް ލިބިގެންދިޔަ އެންމެބޮޑު އެއް ހިންހަމަޖެހުމަކީ، ބަޖެޓްކޮށްފައިވާ މިސްކިތް، އިސްލާމީ މަރުކަޒަކަށް ބަދަލުކުރެއްވި  ހަބަރެވެ. އިހަވަންދޫގައި އިސްލާމަރުކަޒެއް ޤާއިމް ކުރުމަކީ ރައީސް މުޢިއްޒުގެ ރިޔާސީ ވައުދަކަށްވާއިރު، އިހަވަންދޫ ކައުންސިލުންވެސް އޮތީ މިސްކިތް އިސްލާމީ މަރަކުޒަކަށް ބަދަލުކުރުމަށް އެދިފައެވެ. ކައުންސިލްގެ އެދިލެއްވުމާ އެއްގޮތަށް، އިސްލާމީ މަރުކަޒެއް އަޅަން އިސްލާމިކް މިނިސްޓްރީއިން ނިންމެވިކަން ކައުންސިލަށް އަންގައި އަދި އެމަސައްކަތް 2024 ވަނައަހަރުގެ ތެރޭގައި ފެށުމަށް 150 ފޫޓް 150 ފޫޓްގެ ބިމެއް ހަމަޖައްސައިދިނުމަށް އިސްލާމިކް މިނިސްޓްރީއިން އެދިލެއްވީ ރައީސް އިހަވަންދޫއަށް ވަޑައިގަތުމުގެ ކުރިން 24 ފެބްރުއަރީ 2024 ގައެވެ. އެހެން ކަމުން، ކައުންސިލާއި ރައީސް ބައްދަލުކުރެއްވުމުން ކައުންސިލުންވަނީ އިހަވަންދޫގައި އިސްލާމިކް ސެންޓަރެއް ޤާއިމްކުރުމަށް ނިންމެވީތީ ރައީސުލްޖުމްހޫރިއްޔާއަށް ޝުކުރުއަދާކުރައްވާފައެވެ. އަދި ރައީސް ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި، އިހަވަންދޫގައި އިސްލާމިކް ސެންޓަރު ބިނާކުރުމަށް ނިންމެވިކަން އިޢުލާން ކުރެއްވުން ވެގެންދިޔައީ ރައްޔިތުންނަށް ލިބިގެންދިޔަ އިތުރު ޔަޤީންކަމަކަށެވެ. 2024 ވަނަ އަހަރުގެ ފެބުރުއަރީ މަހުގެ 29 ވަނަ ދުވަހު އިހަވަންދޫ ކައުންސިލުންވަނީ އިސްލާމިކް މިނިސްޓްރީއިން އެދިލެއްވި ގޮތަށް، އިސްލާމީ މަރުކަޒު އެޅުމުގެ މަސައްކަތް ފެށުމަށް ބޭނުންވާ، 150 ފޫޓް 150 ފޫޓް ބިން ހަމަޖައްސަވައި ދެއްވައިފައެވެ.