އިހަވަންދޫގައި ސަރުކާރުން ތަރައްޤީކުރާ ފިޝަރީޝް ކޮމްޕްލެކްސްގައި ހިމެނޭ، 1000 މެޓްރިކް ޓަނުގެ ކޯލްސްޓޯރޭޖާއި، ބްރައިން ފްރީޒިންގ، ޕަވަރ ސަޕްލައި އިގެ މަސައްކަތާ، ސަރުކާރުން އިހަވަންދޫގައި އަލަށް ތަރައްޤީކުރާ 30 ޓަނުގެ އައިސް ޕްލާންޓްގެ މަސައްކަތް އެތިއޯން ޕްރައިވެޓް ލިމިޓެޑާއި ހަވާލުކޮށްފިއެވެ.
މިނިސްޓްރީ އޮފް ފިޝަރީޒް އެންޑް އޯޝަންސް ރިސޯސަސް އިން މިނޫހަށް މައުލޫމާތު ދިންގޮތުގައި، އެ މަސައްކަތް އެކުންފުންޏާ ހަވާލުކުރީ 160 މިލިއަން ރުފިޔާގެ އަގަކަށް، ބިން ހަވާލުކޮށް އެމަސައްކަތް ފަށާތާ 8 މަސްދުވަހުގެ ތެރޭގައި ނިންމާ ގޮތަށެވެ. އެ މަސައްކަތް އެތިއޯން ޕްރައިވެޓް ލިމިޓެޑާއި ހަވާލުކުރީ މިހިނގާ ސެޕްޓެމްބަރު މަހުގެ 10 ވަނަ ދުވަހުއެވެ.
އިހަވަންދޫގައި ތަރައްޤީކުރާ ފިޝަރީޒް ކޮމްޕްލެކްސްގެ ބީންގާ އަޅާފައިވަނީ 2025 އަހަރުގެ ޖެނުއަރީ މަހުގެ 29 ވަނަ ދުވަހުއެވެ. އެދުވަހު ރައީސް ޑރ. މުހައްމަދު މުއިއްޒު އިހަވަންދޫ ރައްޔިތުންނާއި ބައްދަލުކުރައްވައި ވިދާޅުވީ ފިޝަރީޒް ކޮމްޕްލެކުސްގެ އަމަލީ މަސައްކަތް 2025 އަހަރުގެ މެއިމަހު ފެށޭނެ ކަމަށާ، އަމާޒަކީ މަސައްކަތް ފަށާތާ 18 މަސް ދުވަހުގެ ތެރޭގައި މުޅި މަޝްރޫއު ނިންމުންކަމަށެވެ.
އިހަވަންދޫ ފިޝަރީޒް ކޮމްޕްލެކުސްގެ މަޝްރޫޢު އަކީ އިހަވަންދޫގައި މިހާތަނަށް ހިންގާ އެންމެ ބޮޑު މަޝްރޫއެވެ. އެމަޝްރޫޢުގެ އަގު 416 މިލިއަން ރުފިޔާއަށް އަރާއިރު، ފިޝްކަލެކްޝަން ފެސުލިޓީގެ ބަނަދަރަށް 58 މިލިއަން ރުފިޔާ ހަރަދުވާނެއެވެ. އިހަވަންދޫގައި ފިޝަރީޒް ކޮމްޕްލެކްސް އެޅުމަށް ހަމަޖެހިފައިވަނީ އިސްލާމިކް ޑިވަލޮޕްމެންޓް ބޭންކު، އައިޑީބީގެ މާލީ އެހީތެރިކަމާއެކުއެވެ. މި މަޝްރޫއުގެ ދަށުން 1000 ޓަނުގެ ކޯލްޑް ސްޓޯރޭޖަކާއި 50 ޓަނުގެ ބްރައިން ފްރީޒިން ފެސިލިޓީއެއް ތަރައްގީކުރުމަށް ވަނީ ހަމަޖެހިފައެވެ. އަދި އޮފީސް އިމާރަތަކާއި އިންޖީނުގެއާއި ވެހިކަލް ވަރކްޝޮޕުގެ އިތުރުން ގުދަނެއް އެޅުމަށްވެސް ހަމަޖެހިފައިވެއެވެ. މީގެ އިތުރުން 130 މީޓަރުގެ ދިގު އެއްގަމަށް މަގަތުފާލަމަކާއި 3 ޕޮއިންޓުން މަސްކިރޭ ގޮތަށް 3.5 މީޓަރުގެ ފުންމިނުގެ ބަނދަރެއްވެސް ތަރައްގީކުރުމަށް ހަމަޖެހިފައިވެއެވެ.
ކޮމެންޓް
އަދި ކޮމެންޓެއް ނެތް