އަންނަ ބުރާސްފަތި ދުވަހުގެރޭ ކުޑަކުދިންގެ ޕާކް ހުޅުވަނީ

މިމަހުގެ 19 ވާބުރާސްފަތި ދުވަހުގެރޭ އިހަވަންދޫ ކުޑަކުދިންގެ ޕާކް ހުޅުވާނެކަމަށް، އިހަވަންދޫ ކައުންސިލްގެ ރައީސް އަހްމަދު ސޮބާހް މިނޫހަށް މައުލޫމާތު ދެއްވައިފިއެވެ. 2009 ވަނަ އަހަރު އިހަވަންދޫގައި ފާހަގަކުރި މަސްވެރިންގެ ދުވަހާއި ގުޅުވައިގެން ހުޅުވި އިހަވަންދޫ ކުޑަކުދިންގެ ޕާކް، ވަރަށްބޮޑަށް ވީރާނާ ވެފައިވަނިކޮށް މިދައުރުގެ ކައުންސިލުންވަނީ ކުޑަކުދިންގެ ޕާކު މަރާމާތުކޮށް އާބާތުރަ ފިލުވުމުގެ މަސައްކަތް ފަށައިފައެވެ. އެގޮތުން މަރާމަތަށް ޕާކް ބަންދު ކޮށްފައި އޮންނަތާ އަހަރަކަށްވުރެ  ގިނަދުވަސް ވެއްޖެއެވެ. އިހަވަންދޫ ކައުންސިލުންވަނީ ހަޒް އިންވެސްޓްމަންޓާއި ހަވާލުކޮށްގެން ކުޑަކުދިންގެ ޕާކުގައި ޓާފް އެޅި މިނީ ފުޓްސަލް ދަނޑެއް ތަރައްޤީކޮށްފައެވެ. އަދި ކުޑަކުދިންގެ ޕާކުގައި އިމާރާތް ކޮށްފައިވާ ކެފޭއިންވަނީ ހިދުމަތް ދޭންފަށައިފައެވެ. މީގެއިތުރުން ޕާރކަށް ބޭނުންވާ ޕާރކު ސެޓް އަތުރާފައިވާއިރު ޖުލައި މަހުވަނީ ޕާކުގެ ނުނިމިހުރި މަސައްކަތް ކުރުމަށް ހަޒް އިންވެސްޓްމަންޓާއި ހަވާލުކޮށްފައެވެ. ސެޕްޓެމްބަރ މަހު މިނޫހަށް މައުލޫމާތު ދެއްވަމުން، ކައުންސިލްގެ ރައީސް ސޮބާހް ވިދާޅުވީ ކުޑަކުދިންގެ ޕާކްގެ މަސައްކަތް ނިމުމުން، އެޕާކް ވެގެންދާނީ މިސަރަހައްދުގައި އޮތް އެންމެ ރީތި ހިތްފަސޭހަ ޕާރކަށްކަމުގައެވެ.