ޒަމާނީ ފެންވަރަކަށް ތަރައްޤީ ކުރަމުންދާ އިހަވަންދޫ ހުރަވީ ދަނޑުގައި ލައިޓް ޖެހުމުގެ މަސައްކަތް ފަށައިފިއެވެ. ސަރުކާރުން ބިޑަކާއި ނުލާ ހަވާލުކުރި މަޝްރޫއުތަކުގެ ތެރޭގައި ހިމެނޭ މިމަސައްކަތް ފަށާފައިވަނީ މިއަދުއެވެ. ބިޑަކާއި ނުލާ މިމަސައްކަތް ހަވާލުކޮށްފައިވަނީ ޓީ.އޭ ކޮންސްޓްރަކްޝަން އެންޑް ޓެރޭޑިންގ އާއެވެ. އެކުންފުންޏާ މިމަސައްކަތް ހަވާލުކޮށްފައިވަނީ 2.4 މިލިއަން ރުފިޔާގެ އަގަކަށެވެ. މައުލޫމާތު ލިބިފައިވާ ގޮތުގައި އެކުންފުނިން މިމަސައްކަތް ފަށާފައިވަނީ ލޯކަލް ސަބް ކޮންޓްރަކްޓަރަކާއި ހަވާލު ކޮށްގެންނެވެ.
ހުރަވީ ދަނޑުގެ މަސައްކަތް ނިމޭނީ އަންނަ އޭޕްރީލް މަހު ކަމަށް، އިހަވަންދޫ ހުރަވީ ދަނޑު ޒަމާނީ ފެންވަރަށް ތަރައްޤީކުރުމުގެ މަސައްކަތް ހަވާލުކޮށްފައިވާ ރޯޑް ޑިވްލޮޕްމަންޓް ކޯޕަރޭޝަން (އާރު.ޑީ.ސީ) އިން ބުނެފިއެވެ. އެކުންފުނިން މިހެންބުނީ ދަނޑުގެ މަސައްކަތް ނިމޭނެ ދުވަހަކާއި ގުޅޭގޮތުން މިނޫހުންކުރި ސުވާލެއްގެ ޖަވާބުގައެވެ. އާރުޑީސީއިން މިނޫހަށް މައުލޫމާތު ދިންގޮތުގައި، ހުރަވީ ދަނޑުގައި ޓާފްއެޅުމުގެ މަސައްކަތް ލަސްވެފައިވަނީ ޓާފް އެޅުމަށް ބޭނުންވާ މެޓީރިއަލްސް ރާޖެއަށް ގެނެވިފައިނުވާތީއެވެ. ޓާފްއެޅުމަށް ބޭނުންވާ މެޓީރިއަލްސް ހޯދުމަށް އެސްޓީއޯއާ ހަވާލުކޮށްފައިވާކަމަށްވެސް އާރުޑީސީއިން މައުލޫމާތު ދިނެވެ.
ހުރަވީ ދަނޑު، ޒަމާނީ ފެންވަރަށް ތަރައްޤީކުރުމުގެ މަސައްކަތް ކުރަމުންދާ ރޯޑް ޑިވްލޮޕްމަންޓް ކޯޕަރޭޝަން (އާރު.ޑީ.ސީ) އިން ދަނޑުގެ ސަބްބޭސް ހެދުމުގެ މަސައްކަތުގެ ތެރެއިން ކޮނެފައިވާ ވަޅުގަނޑަކަށް ކުނިއެޅުމުން ފާޑުކުޔުން އާޒުވުމުން، އެކުންފުނިން އެޅި ކުނި ނަގައިފިއެވެ. އެވަޅުގަނޑަށް ކުނިއަޅާފައިވަނީ މިއަދުގެ ވަގުތެއްގައެވެ. އެކުނިތައް ނެގުމުގެ މަސައްކަތް ފަށާފައިވަނީ މިއަދުގެ ހަވީރުއެވެ. ސަބްބޭސް ހެދުމުގެ މަސައްކަތުގެ ތެރެއިން ކޮނެފައިވާ ވަޅުގަނޑަކަށް ކުނިއެޅުމުންދާކަން އާމުންގެ ސަމާލުކަމަށް ގެނެސްފައިވަނީ، އިހަވަންދޫ ކައުންސިލްގެ ކުރީގެ ރައީސް މުހައްމަދު ރަޝީދުއެވެ.
ހުރަވީ ދަނޑު، ޒަމާނީ ފެންވަރަށް ތަރައްޤީކުރުމުގެ މަސައްކަތް، ރޯޑް ޑިވްލޮޕްމަންޓް ކޯޕަރޭޝަން (އާރު.ޑީ.ސީ) އާ ހަވާލުކޮށްފައިވަނީ 4،832،827.50 ރުފިޔާއަށްކަމަށް މިނިސްޓްރީ އޮފް ސްޕޯޓްސް، ފިޓްނެސް އެންޑް ރެކްރިއޭޝަނުން ބުނެފިއެވެ. މިނޫހުންކުރި ސުވާލެއްގެ ޖަވާބުގައި އެމިނިސްޓްރީއިން ބުނީ، 4.8 މިލިއަން ރުފިޔާގެ އަގަކަށް އެކުންފުންޏާއި މިމަސައްކަތް ހަވާލުކޮށްފައިވަނީ 105 ދުވަހުގެ ތެރޭގައި އެމަސައްކަތް ނިންމާގޮތަށެވެ.
އިހަވަންދޫ ހުރަވީ ދަނޑު، ޒަމާނީ ފެންވަރަށް ތަރައްޤީކުރުމުގެ މަސައްކަތް އެމަސައްކަތް ހަވާލުކޮށްފައިވާ ރޯޑް ޑިވްލޮޕްމަންޓް ކޯޕަރޭޝަން (އާރު.ޑީ.ސީ) އިން ފަށައިފިއެވެ.
ހުރަވީ ދަނޑު، ޒަމާނީ ފެންވަރަށް ތަރައްޤީކުރުމުގެ މަސައްކަތް ރޯޑް ޑިވްލޮޕްމަންޓް ކޯޕަރޭޝަން (އާރު.ޑީ.ސީ) އާއި ހަވާލުކުރުމުގެ އެއްބަސްވުމުގައި ސޮއެކޮށްފިއެވެ. އެކުންފުންޏާއި މިމަސައްކަތް ހަވާލުކުރުމުގެ އެއްބަސްވުމުގައި ސޮއެކޮށްފައިވަނީ ރައީސުލްޖުމްހޫރިއްޔާ ޑރ މުހައްމަދު މުއިއްޒު އިހަވަންދޫއަށް ކުރައްވަމުންގެންދަވާ ދަތުރުފުޅުގެ ތެރެއިން މިއަދު ހަވީރު އިހަވަންދޫގެ ރައްޔިތުންނާ ބައްދަލުކުރެއްވުމަށް އިހަވަންދޫ ސްކޫލްގެ މަލްޓި ޕާޕޯސް ހޯލްގައި އޮތް ޖަލްސާގައެވެ. މި އެއްބަސް ވުމުގައި ސްޕޯޓްސް އެންޑް ރެކްރިއޭޝަން މިނިސްޓްރީގެ ފަރާތުން ސޮއެކުރެއްވީ، މިނިސްޓަރ އޮފް ސްޕޯޓްސް އެންޑް ރެކްރިއޭޝަން އަބްދުﷲ ރާފިއު އެވެ. އަދި އާރު.ޑީ.ސީގެ ފަރާތުން މި އެއްބަސްވުމުގައި ސޮއެކުރެއްވީ ބްރިގޭޑިއަރ ޖެނެރަލް (ރޓޑ) ޢަލީ ޒުޙައިރުއެވެ.
ހުރަވީ ދަނޑުގައި ޓާފް އެޅުމުގެ މަސައްކަތް، މިއަހަރު ކުރާނެކަމަށް މިނިސްޓަރ އޮފް ސްޕޯޓްސް އެންޑް ރެކްރިއޭޝަން އަބްދުﷲ ރާފިއު ވިދާޅުވެއްޖެއެވެ. ސްޕޯޓްސް މިނިސްޓަރ މިހެން ވިދާޅުވީ، ބިއުޓިފުލް ބްލޫ މައިކަޕް ފުޓްބޯޅަ މުބާރާތް 2024 ނިންމުމުގެ ރަސްމިއްޔާތުގައި ވާހަކަ ދައްކަވަމުންނެވެ. "މިރަށު ހުރަވީ ދަނޑަކީ ވަރަށް މުހިއްމު ދަނޑެއް. އެދަނޑުގަ ޒަމާނީ ފެންވަރަށް ކުޅިވަރު ކުޅެވޭނެ ގޮތް ހެދުން، އަޅުގަނޑު ދަންނަވާނީ އިރާދަކުރެއްވިއްޔާ މިއަހަރު ތެރޭގަ ޓާފް އެޅެމުގެ މަސައްކަތް އަޅުގަނޑުމެން މިނިސްޓްރީއިން ކުރަމުން ގެންދާނެކަން. އެހެންވީމާ އެޔަޤީންކަން އަޅުގަނޑު ތިޔަ ހުރިހާ ބޭފުޅުންނަށްވެސް އަރުވަން" މިނިސްޓަރ ރާފިއު ވިދާޅުވިއެވެ.
