ނޫރު މަދަހަ މުބާރާތުގެ 3 ވަނަ ސީޒަން ފަށައިފި

ހއ. މޮޅަދޫ ކައުންސިލުން އިސްނަގައިގެން، އެ ރަށު އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި މޮޅަދޫ ސްކޫލް ގުޅިގެން ބާއްވާ "ނޫރު މަދަހަ މުބާރާތް" ސީޒަން 3  ފަށައިފިއެވެ. މި މުބާރާތުގެ ފުރަތަމަ ސެޝަން ރޭ މޮޅަދޫ ސްކޫލްގައި ކުރިއަށް ގެންގޮސްފައިވާއިރު، މިއީ މި މުބާރާތް ބާއްވާ ތިންވަނަ އަހަރެވެ. މިއަހަރުގެ މުބާރާތުގައި ޖުމްލަ 34 ބައިވެރިން ބައިވެރިވެފައިވެއެވެ. މުބާރާތުގެ ތާވަލް ރޭވިފައިވާ ގޮތުން، ދެވަނަ ސެޝަން މިއަދު ހަވީރު ކުރިއަށްދާނެއެވެ. އަދި ތިންވަނަ ސެޝަން މިރޭ ބޭއްވުމަށް ވަނީ ހަމަޖެހިފައެވެ. މި މުބާރާތުގެ ފައިނަލް ރައުންޑް އޮންނާނީ މި މަހުގެ 4 ވާ ބުދަ ދުވަހުގެ ރޭގައެވެ. މުބާރާތުގެ ވަނަވަނައަށް ހޮވޭ ފަރާތްތަކަށް އަގުހުރި އިނާމުތަކެއް ހުށަހަޅާފައިވާއިރު، މުޅި މުބާރާތުން އެއްވަނައަށް ހޮވޭ ބައިވެރިއަކަށް ދިނުމަށް ހަމަޖެހިފައިވަނީ ވަރަށް ޚާއްޞަ އިނާމެކެވެ. އެގޮތުން އެއްވަނަ ބައިވެރިއަކަށް އުމުރާ ދަތުރަކާއި 6،000 ރުފިޔާ ދިނުމަށް ކައުންސިލުން ވަނީ ނިންމާފައެވެ.