އިހަވަންދޫއަކީ ހީވާގި ރައްޔިތުންތަކެއް ދިރިއުޅެމުން ގެންދާ ދިވެހި ރާއްޖޭގެ ޖަޒީރާ ރައްތަކުގެ ތެރެއިން ރަށެކެވެ. އަބަދުވެސް އިހަވަންދޫ ރައްޔިތުންނަކީ އެބައިމީހުން ކުރާމަސައްކަތުގެ އެހީގައި އެބައިމީހުންގެ ދިރިއުޅުމުގެ ފެންވަރު ރަނގަޅު ކުރުމަށް މަސައްކަތް ކުރާ ބައެކެވެ. ވަކިމީހަކުދައްކާ ދަޅައަކަށް ހެއްލި އެބައިމިހުންގެ މަސައްކަތްތައް ހުއްޓާލައި ދެއަތް އުރާލާގެން ތިބޭނެ ބައެއްނޫނެވެ. އެބައިމީހުންގެ މަސައްކަތްތަކުގައި ފަރުވާތެރި އެއްބައިވަންތަ ބައެކެވެ.

އިހަވަންދޫއަކީ ރާއްޖޭގެ ވެރިކަން ބަދަލުކުރުމުގައި، މިހާރުގެ ރައީސާއެކު އަނެއް ދިވެހި ރާއްޖޭގެ ނަމުގައި ކެންޕޭނުކޮށް ވެރިކަން ބަދަލުކުރުމަށް އެންމެ ބޮޑު އެހީތެރިކަމެއްވި އެއްރަށެވެ. އެކަން އެހެންވި އެއްސަބަބަކީ ކެންޕޭނުތެރޭގައި ދެއްކި ހުވަފެންތަކެވެ. އާދޭހެވެ. ކޮންމެ މީހަކުވެސް ކަމެއް ބޭނުންވެފައި ހުންނަ ހިނދުކޮޅުތަކުގައި ދޮގާއި މަކަރު ހެދުމަކީ އާއްމުކަމެކެވެ. ރައިސް ނަޝީދުގެވެސް އަމަލުތައް ހުރީ ހަމައެގޮތަށެވެ. އެމަނިކުފާނު ކެންޕޭނުގެ ތެރޭގައި ދެއްކި ވާހަކަތައް ބިލާހަކަށް ވެއްޖެއެވެ. އަޅުގަނޑުމެންނަށް މިހާރު ފެންނަމުން މިދަނީ އިހަވަންދޫގެ ރައްޔިތުންގެ ތެރެއިން ގިނަބަޔަކު ނިދިންހޭލައި މަންޒަރެވެ.

ކެންޕޭނު ތެރޭގައި އެމަނިކުފާނު ދެއްކެވި ނުވަތަ ދެއްކެވުނު ވާހަކަތަކަށް މިވަގުތު އަޅުގަނޑު ބަލައިލާކަށް ބޭނުމެއްނޫނެވެ. ސަބަބަކީ އެއީ ވެރިކަން ހޯދަންވެގެން އެމަނިކުފާނު ދެއްކެވި ދަޅަތަކަކަށް ވާތީއެވެ. މިހާރު އަޅުގަނޑު އަލި އަޅުވާލަން ބޭނުންވަނީ ވެރިކަން ލިބުމަށްފަހު އެމަނިކުފާނު އިހަވަންދޫއަށް ވަޑައިގެން ދެއްކެވި ޖާދުވީ ވާހަކަ ތަކުގެ މައްޗަށެވެ. އެމަނިކުފާނުވީ ވަޢުދު ނުފުއްދައޭ ބުނާކަށް ބޭނުމެއް ނޫނެވެ. ސަބަބަކީ އެމަނިކުފާނު ވިދާޅުވާ ގޮތުގައި އެމަނިކުފާނު ކުރި ފުރަތަމަ ވަޢުދު ފުއްދާފިއެވެ. އެއީ ރައްޔިތުންގެ  އާއްމުހާލަތު ދައްކުރުމުގެ ގޮތުން 11 ނޮވެމްބަރު 2008 ވީ ދުވަހު ވެރިކަމުގެ ހުވާކުރުމުގެ ވަޢުދު ފުއްދާފައި ވާތީއެވެ.

ރައީސް ނަޝީދު 2009 މެއި 5 ވީ އަންގާރަދުވަހު އިހަވަންދޫއަށް ވަޑައިގެން އިހަވަންދޫ މަދަރުސާގައި އިހަވަންދޫގެ ރައްޔިތުންނާ ބައްދަލުކޮށް ދެއްކި ހުވަފެންތަކުގެ ތެރެއިން އެއްހުވަފެނަކީ އިހަވަންދޫގައި ބޮޑު ބަނދަރެއް، ރަނގަޅު ބަނދަރެއް 2009 ވަނަ އަހަރުތެރޭގައި ހަދައިދޭނެ ކަމުގެ ހުވަފެނެވެ. އެމަނިކުފާނު އެދުވަހު އެދެއްކެވި ވާހަކަތަކަކީ ބިލާހެއްކަން މިހާރު ޔަޤީން ވެއްޖެއެވެ. މިއަހަރުގެ އާދެ! 2010 ވަނައަހަރުގެ ބަޖެޓުގައި އިހަވަންދޫގެ ބަނދަރު ހެދުމުގެ މަސްރޫއުގެ ވާހަކަ ނެތްކަމީ އެކަމުގެ އެއްދަލީލެވެ.

ދެއްކި ދަޅަތަކުގެ ތެރެއިން ދެވަނަ ކަމަކީ އިހަވަންދޫގެ ރައްޔިތުންނަށްޓަކައި، އިހަވަންދޫގައި މަސްބަންދުކުރާ ފެކްޓްރީއެއް 2009 ވަނަ އަހަރު ނިމުމުގެ ކުރިން ހަދައިދޭނެކަމުގެ ހުވަފެނެވެ. އިހަވަންދޫގެ ރައްޔިތުން ބާނާމަސް އަގުބޮޑުކޮށް ވިއްކުމަށް އިހަވަންދޫގެ ރައްޔިތުންނަށް ލިބޭނެކަމަށް ބުނި ރަނުގެ ފުރުޞަތު ލިބޭނޭ ކަމުގެ އެއްވެސް ޔަޤީންކަމެއްނެތެވެ. އިހަވަންދޫގެ ޒުވާނުންގެ ތެރެއިން ގިނަ ޒުވާނުންތަކެއް ރަށުގައި ތިބެގެން ވަޒީފާ އަދާކުރުމުގެ އުފާވެރިކަމުގެ ތެރޭގައި ތިއްބެވެ. ރައީސް ނަޝީދު އެދެއްކެވި އެހުވަފެން ހަޤީގަތަކަށް ވާނެކަމުގެ އެއްވެސް ޔަޤިންކަމެއް މިހާރަކު ނެތެވެ. 2010 ވަނަ އަހަރަށް ލަފާކުރާ ބަޖެޓުގައިވެސް އެމަނިކުފާނު އެބުނާ މަސްބަންދުކުރާ ކާރުހާނާގެ ނަންވެސް ފެންނަން ނެތްކަމީ ވަރަށް ދެރަކަމެކެވެ.

ރައީސް ނަޝީދުވަނީ 2009 މެއި 5 ވީ އަންގާރަ ދުވަހު އިހަވަންދޫގައި ދެއްކެވި ވާހަކަ ފުޅުގެތެރޭގައި އިހަވަންދޫގައި ތިބެގެން މަތީ ތަޢުލީމު ހޯދައިދިނުމަށްޓަކައި ބޭރުން މަދަރުސާއެއް ގެންނާނެވާހަކަ ވިދާޅުވެފައެވެ. އެއީ އެހެން ގައުމުތަކުގެ މީހުންވެސް މަތީ ތައުލީމު ހޯދުމަށް އިހަވަންދޫއަށް އައުން އެކަށީގެންވާ ފެންވަރުގެ މަދަރުސާއެކެވެ. ނަމަވެސް 2010 ވަނައަހަރު ފެށިގެން ދިޔައިރުވެސް މިދިޔަ 2009 ވަނަ އަހަރުގެ ތެރޭގައި އަޅާދޭން ބުނި މަދަރުސާ އަދި އެޅާފައެއް ނެތެވެ. މީވެސް ތެދަކަށް ވާނެކަމުގެ ޔަޤީން ކަމެއްނެތެވެ.

ވަރަށް އާދައިގެ ކަމެއްކަމަށްބުނެ 2009 ވަނަ އަހަރުތެރޭގައި ނަރުދަމާއާއި ފެނާއި ކަރަންޓުގެ ހިދުމަތް ފެށޭނެކަމަށް ބުނިނަމަވެސް އެއިން އެއްވެސް ކަމެއް އަދި ފެށިފައެއްނެތެވެ. އަދި 2010 ވަނައަހަރަށް ލަފާކުރާ ބަޖެޓުގައިވެސް އެމަނިކުފާނު އެދެންނެވި ހިދުމަތްތަކުގެ ވާހަކަ ނެތްކަމަކީ ރައީސް ނަޝީދަކީ ވަރަށްބޮޑަށް ދަޅަ ދައްކާ ބޭފުޅެއްކަން ޔަޤިންވާ އެއްސަބަބެވެ.

2009 ވަނަ އަހަރުތެރޭގައި އިހަވަންދޫގެ ވަށައިގެންވާ މަގުގައި ޓާރު އަޅައިދޭނެކަމަށާއި 2009 ވަނައަހަރު ތެރޭގައި 100 ގެ އެޅުމުގެ މަސައްކަތް ފަށާނެވާހަކަ ބުންޏެވެ. އެހެންނަމަވެސް ހުސްވަޢުދުވާ ރައީސް ނަޝީދުގެ އެވަޢުދު ފުއްދޭނެކަމުގެ އެއްވެސް ޔަޤިން ކަމެއްނެތެވެ. އެމަނިކުފާނު ވިދާޅިވި ފަދައިން އިހަވަންދޫގެ ރައްޔިތުންނަށް ދެއްކޭނެ ދަޅައެއް ނޯންނާނެއެވެ. އަދި ހާއްޞަކޮށް ރައީސް ނަޝީދަކަށް އިހަވަންދޫގެ ރައްޔިތުންނަށް ދެއްކޭނެ ދަޅައެއް ނުދެއްކޭނެއެވެ. ރައީސް ނަޝީދަށް ކުރެވޭނެ ހާވެސް ކަމަކީ ސިވިލްސާވެންޓުންގެ މުސާރަ ކުޑަކުރުމާއި، ކަރަންޓުގެ އަގުބޮޑުކުރުންފަދަ ކަންތައްތަކެވެ. މަނިކުފާނަށް ވެރިކަން ނުކުރެވޭނެކަމަށް ވާނަމަ އަވަހަށް އިސްތިޢުފާދެއްވާ ގެކޮޅަށް ވަޑައިގަންނަވާށެވެ.